कलाकार दीपकराज गिरि र दीपा श्री निरौलाको टिमले फिल्म हल सञ्चालनमा ल्याउने भएको छ। नयाँ बानेश्वरस्थित शंखमुलमा अहिले सिनेमा हलको निर्माण कार्य भइरहेको छ।

९ करोडको लगानीमा फिल्म ‘छक्का पञ्जा’ टिम लगायतले मल्टिप्लेक्स सिनेमा हल निर्माण गर्न लागिरहेको कलाकार दीपकराज गिरिले जानकारी दिए। दुई वटा स्क्रिन रहने सिनेमा हलमा चार सय सिट रहने छन्।

देशैभर कोरोनाका कारण अहिले धेरै फिल्म हलहरु बन्द भइसकेका छन्। हल बन्द भइरहेको खबर आइरहेको समयमा हल खुल्न लागेको खबर सार्वजनिक हुँदा फिल्म क्षेत्रमा सकारात्मक सन्देश जाने दीपकको तर्क छ।