स्पेनिस ला लिगा अन्तर्गत गएराति भएको खेलमा रियल मड्रिडले गेटाफेमाथि जित निकालेको छ। स्टेडियो अल्फ्रेडो डी स्टेफानोमा सम्पन्न खेलमा घरेलु टोली मड्रिडले गेटाफेमाथि २-० गोलअन्तरले जित निकालेको हो।

पहिलो हाफ गोलरहित बराबरीमा रोकिएको खेलमा रियललाई करिम बेन्जेमाले अग्रता दिलाएका थिए। उनले खेलको ६० औं मिनेटमा भिनिसियस जुनियरको पासमा गोल गर्दै मड्रिडलाई अग्रता दिलाए। त्यस्तै ६ मिनेटपछि फेरल्याण्ड मेन्डीले मार्सेलोको पासमा गोल गोल गर्दा रियलले सहज जित निकाल्यो।

जितसँगै रियलले अंकतालिकाका शीर्षस्थानको एट्लेटिको मड्रिडसँग अंकदुरी घटाएको छ। दोस्रो स्थानको रियलले २२ खेलबाट ४६ अंक जोडेको छ भने एट्लेटिकोले २० खेलबाट ५१ अंक जोड्दै शीर्षस्थानमा छ। २४ अंक जोडेको गेटाफे भने तालिकाको १३ औं स्थानमा छ।