पारिवारिक फिल्म बनाउन पोख्त बलिउड निर्माता सुरज बडजात्या यतिबेला चार साथीको कथा समेटिएको फिल्म ‘उचाइ’को नेपालमा छायांकन गरिरहेका छन् । सर्वाधिक उचाइमा रहेको हिमालय पर्वत श्रृंखलाको ट्रेकिङमा निस्किएका चार साथीहरु बोमन इरानी अनुपम खेर, अमिताभ बच्चन र डेनी डेन्जोङ्पाको आत्मियतालाई फिल्मले देखाउने छ ।

फिल्मको नेपालतर्फका लाइन प्रोड्युसर सुरज आचार्यले दैनिक भास्करसँगको कुराकानीमा फिल्मको सुटिङबारे विस्तृत जानकारी दिएका छन् । ‘फिल्मको सुटिङ चार अक्टोबरबाट सुरु भएको छ । यसको पहिलो सुटिङ तालिका काठमाडौंको छ । यहाँ दुई दिन छायांकन गर्छौ । मंगलबार फिल्मको एक प्रमुख सिक्वेन्स काठमाडौं एयरपोर्टमा गरेका छौं । हामी तीन दिनका लागि लुक्ला जाँदैछौं’, सुरजले भनेका छन् ।

सुरजले फिल्ममा चार साथीहरुको ‘एडभेञ्चर ट्रिप’ देखाउनका लागि विश्वकै सबैभन्दा खतरनाक एयरपोर्टका रुपमा परिचित लुक्लालाई छनोट गरिएको खुलाए । ‘यहाँ अक्टोबर ६ देखि ९ सम्म परिणीति चोपडा, बोमन इरानी, अनुपम खेर, सारिका र नीना गुप्ताको दृश्य खिचिनेछ’, सुरजले अगाडि भनेका छन् ।

लुक्ला पछि फिल्मको टिम नाम्चे पुग्नेछ । जसको उचाइ ४ हजार मिटर अर्थात १३ हजार फिटको छ । यहाँ अक्टोबर १८ सम्म सुटिङ हुनेछ । सुरजका अनुसार नाम्चेपछि टोली मनाङ पुग्नेछ ।

फिल्म निर्माताले समुन्द्र सतहदेखि आठ हजार मिटर अर्थात् २६ हजार फिटको उचाइमा सुटिङ गर्ने उद्देश्य राखेका छन् । जसमा अन्नपूर्णका अलावा सगरमाथा बेस क्याम्प पनि पर्छ । चार साथीहरु सगरमाथाको आधार शिविर पुगेपछि फिल्मको दृश्य पुरा हुनेछ ।

यो फिल्मका लागि १ सय ५० जनाको टोली मुम्बईबाट चार्टड विमानमा काठमाडौं आएका छन् ।

१३ हजार फिटको उचाइमा खिचिने फिल्ममा अभिनेत्री परिणीति चोपडा टुरिस्ट गाइडको भुमिकामा देखिँदैछिन् । फिल्मको लागि बोमन, परिणीति र अनुपम नेपाल आइसकेपनि अमिताभ र डेनी भने केही समयपछि आउनेछन् ।