जनता समाजवादी पार्टी(जसपा)को उपेन्द्र यादव पक्ष आधिकारिकता दावी गर्न निर्वाचन आयोगमा जाने निर्णय गरेको छ ।

काठमाडौंमा बसेको यादव समूहको कार्यकारिणी बैठकले बहुमत सदस्यको नागरिकता लिएर आधिकारिकता दावी गर्न निर्वाचन आयोगमा उपस्थित हुने निर्णय गरेको हो ।
पार्टीको विवाद हल गर्नका लागि आफूहरुको दिएको निवेदन पछि आयोगले कानूनको अर्कै प्रावधान अनुसार आउन सुझाव दिएको भन्दै आधिकारिताका बारेमा टुङ्गो लगाउन निर्वाचन आयोग जाने निर्णय गरिएको जसपा अध्यक्ष उपेन्द्र यादवले जानकारी दिए ।

उनले भने,‘आधिकारिता दाबी गर्न निर्वाचन आयोग जाने निर्णय भएको छ ।’ यादव समूहको बैठकले चुरे क्षेत्रबाट ढुंगा गीटी वालुवा निकासी गर्ने सरकारको निर्णयको समेत विरोध गर्ने निर्णय गरेको उनले जानकारी दिए ।
बैठकले बाढी पहिरो प्रभावितलाई राहत दिन समेत सरकारसँग माग गर्ने निर्णय गरेको छ ।