विश्वकप क्वालिफायर्स अन्तर्गतको दक्षिण अमेरिकी छनोटको आज बिहान सम्पन्न खेलमा अर्जेन्टिना र कोलम्बिया बराबरीमा रोकिएका छन्। कोलम्बियास्थित स्टेडियो मेट्रोपोलिटानोमा सम्पन्न खेलमा अर्जेन्टिना र कोलम्बिया २-२ को बराबरीमा रोकिएका हुन्।

खेलको तेस्रो मिनेटमै क्रिस्टियन रोमेरोले अर्जेन्टिनालाई अग्रता दिलाएका थिए। त्यस्तै ८ औं मिनेटमा नै लिओनार्दो परेडेसले गोल थप्दा पहिलो हाफमा अर्जेन्टिना दुई गोलले अघि रह्यो। दोस्रो हाफमा भने घरेलु टोली पुनरागन गर्न सफल रह्यो।

खेलको ५१ औं मिनेटमा पेनाल्टीमा पाएको अवसर सदुपयोग गर्दै लुईस फर्नान्डोले कोलम्बियाको खाता खोले। त्यस्तै खेलको इन्ज्युरी समयमा मिगुएल बोर्जाले गोल गर्दा खेल २-२ को बराबरीमा टुंगियो।