भ्याक्सिनमा पनि पैसा खान खोजेको छ, भ्रष्टाचार गर्न मात्रै जानेको छ
न्यूजडेली नेपाल
नेपाली कांग्रेसका सभापति शेरबहादुर देउवाले कोभिड-१९ रोकथाम तथा नियन्त्रणका लागि भ्याक्सिन नै महत्वपूर्ण विषय भएको बताएका छन्। सोमवार नेपाली कांग्रेसले कोभिड १९ विरुद्धको अभियान अन्तर्गत बागमती प्रदेशका नेता तथा जनप्रतिनिधिसँग भर्चुअल छलफलमा देउवाले यस्तो बताएका हुन्।
अहिलेको अवस्थामा संकटकाल लगाउनुभन्दा भ्याक्सिनमा जोड दिनुपर्ने उनको भनाई थियो। संकटकालबाट केही हुनेवाला छैन। संकटकाल लगाएर ओलीलाई फाइदा होला तर जनतालाई भ्याक्सिन चाहिएको छ, देउवाले भने, एउटा हैन दुईटा भ्याक्सिन लगाएपछि खतरा कम हुन्छ भन्छन्।
कमिसनको कारण भ्याक्सिन रोकिएको विषयमा देउवाले आक्रोश व्यक्त गरे। भ्याक्सिनमा पनि पैसा खान खोजेको छ। भ्रष्टाचार गर्नुपर्या छ। मन्त्रीले भनिसकेको छ। स्वास्थ्यमन्त्रीले। कोभिडको महामारीमा त्यहाँ पनि कमिसन ल्याउने। त्यसको खिलाफमा कांग्रेस लाग्छ।
उनले यसको विरुद्धमा सांसदमा कुरा उठाउनेसमेत बताए। मान्छेको ज्यान गइरहेको छ। सरकारलाई भने पैसा चाहिएको छ। भोलि हामी पार्लियामेन्टमा कुरा उठाउँछौ।अहिले सरकारले केही नगरेको अवस्थामा कांग्रेसले गाउँगाउँमा सचेतना फैलाउनुपर्ने देउवाले बताए।
