एकै हप्तामा एक हजार २०० जनामा एमपक्स (मंकीपक्स) पुष्टि भएसँगै सन् २०२४ जनवरीयता अफ्रिकामा कुल १८ हजार ७३७ जनामा उक्त भाइरसको संक्रमण फेला परेको अफ्रिकी युनियन स्वास्थ्य एजेन्सीले शनिबार जनाएको छ ।

स्वास्थ्य विभागको तथ्यांकानुसार, भाइरसको तीन भेरियन्ट छन्, तीमध्ये एउटा अत्यधिक घातक, अधिक संक्रामक ‘क्लेड–१ बी’ हो । पछिल्लो समय बढिरहेको एमपक्स संक्रमणलाई विश्व स्वास्थ्य संगठन (डब्ल्यूएचओ)ले  बुधबार अन्तर्राष्ट्रिय स्वास्थ्य आपत्काल घोषणा गरेको थियो ।

हालसम्म १२ अफ्रिकी सदस्य राष्ट्रबाट तीन हजार १०१ घटना पुष्टि हुनुका साथै संक्रमणका कारण ५४१ जनाको मृत्यु भएको रोग नियन्त्रण र रोकथामका निम्ति अफ्रिका केन्द्र (सीडीसी)ले विज्ञप्तिमार्फत जनाएको छ ।