अमेरिकी मिलेनियम च्यालेन्ज कर्पोरेसन (एमसीसी)को सहयोगमा नेपालमा सञ्चालित परियोजनाअन्तर्गत प्रसारणलाइनसम्बन्धी सबै ठेक्का रद्द गरिएको छ ।

मिलेनियम च्यालेन्ज एकाउन्ट (एमसीए) नेपालले ती सबै ठेक्का रद्द गरिएको शुक्रबार एक सूचना प्रकाशित गरी जानकारी दिएको हो ।

ठेक्काहरू ६१ प्रतिशत महंगो भएपछि रद्द गर्नुपरेको एमसीए–नेपाल स्रोतले बताएको छ । अब छिट्टै नयाँ बोलपत्र आह्वान गरिने स्रोतले जनाएको छ ।

प्रसारणलाइनको प्लान्ट डिजाइन, आपूर्ति, वितरण, स्थापना, परीक्षण अन्तर्गतका सबै बोलपत्रहरू रद्द गरिएको सूचनामा उल्लेख छ ।

लप्सीफेदी–रातमाटे–नयाँ हेटौँडा ४०० केभी प्रसारणलाइन, रातमाटे–नयाँ दमौली ४०० केभी प्रसारणलाइन, नयाँ दमौली–नयाँ बुटबल ४०० केभी प्रसारणलाइन र नयाँ बुटबल– नेपाल÷भारत सीमा ४०० केभी प्रसारणलाइनका ठेक्का रद्द गरिएका छन् ।

“प्राप्त बोलपत्रहरूको मूल्यांकन गरियो र मिलेनियम च्यालेन्ज कर्पोरेसन कार्यक्रमको बोलपत्र गाइलाइन्सको खण्ड पी१.ए.२.७५ र पी१.ए.२.७७ बमोजिम बोलपत्र मूल्यहरू मूल अनुमानभन्दा धेरै बढी भएकोले सबै बोलपत्र अस्वीकार गरियो,” एमसीए–नेपालले जारी गरेको सूचनामा बोलपत्र रद्द गर्नुको कारण भनिएको छ ।