दीपक वलीको निर्देशन रहने फिल्म ‘कामिनो मा नीति शाह अनुबन्धित भएकी छिन्। फिल्मको मुख्य भूमिकाका लागि बुधबार नीति र निर्माण टिमबीच सम्झौता भएको हो।

फिल्मको स्क्रिप्ट, पात्र र टिम मन परेपछि नीति काम गर्न राजी भएको बताइएको छ। यसअघि फिल्ममा प्रदीप खड्का, वर्षा शिवाकोटी र राजबल्लभ कोइराला अनुबन्धित भइसकेका छन्। नीतिले प्रदीपसँग यसअघि केही गीत र विज्ञापनमा काम गरिसकेकी छिन्। मिस इन्टरनेशनल २०१७ को उपाधि जितेकी नीतिले यसअघि फिल्म ‘हुतुतु’ र ‘एक्स ९’ साइन गरेकी थिइन्। तर, दुबै फिल्मको अहिलेसम्म छायाङ्कन सुरु हुन सकेको छैन।

एक्सेस नेपाल फिल्म्सको ब्यानरमा निर्माण हुने यो फिल्ममा पूर्ण लामाले क्रियटिभ निर्देशकका रुपमा रहेका छन। फिल्मको स्क्रिप्ट महेश दवाडीले लेखेका हुन्। प्रेम, रोमान्स र सस्पेन्स प्रस्तुत गरिने फिल्मको छायाङ्कन नेपाल र ल्याटिन अमेरिकाका विभिन्न स्थानमा हुनेछ।

चैतको तेस्रो साताबाट छायाङ्कन सुरु हुने फिल्म नेपालीका साथै हिन्दी, अंग्रेजी र स्पेनिस भाषामा बन्ने बताइएको छ।