अफगानिस्तानमा आर्थिक सङ्कट एवम् अत्यावश्यक वस्तुको चरम अभाव गहिरिदै जाँदा त्यहाँका ६० लाख नागरिक भोकमरीको जोखिममा पर्नसक्ने संयुक्त राष्ट्रसंघले चेतावनी दिएको छ ।

चरम गरिबी झेलिरहेका अफगानिस्तानका नागरिकलाई तत्काल आर्थिक सहयोग नगरे उनीहरू भोकमरीको जोखिममा पर्ने संयुक्त राष्ट्रसङ्घले चेतावनी दिएको हो ।

मानवीय सहायतासम्बन्धी राष्ट्रसङ्घका प्रमुखले अन्तर्राष्ट्रिय समुदाय तथा दातृ निकायहरूलाई अफगानिस्तानको आर्थिक विकासका लागि कोष पुनःस्थापना गर्न तथा आगामी शिशिर याम अगावै त्यहाँका अतिविपन्न वर्गलाई सहयोग गर्न तत्काल ७७ करोड डलर आवश्यक भएको जानकारी दिएका छन् । साथै उनले अफगानहरुलाई सहायताका निम्ति आह्वान समेत गरेका छन् ।

सुरक्षा परिषद्को बैठकमा सहायता रकम चीन वा रूस कसले व्यहोर्ने भन्नेबारेमा बहस पनि भएको छ । बैठकमा अमेरिकाले उक्त सहायता राशि कसले तिर्ने भन्ने प्रश्न गरेको जनाइएको छ ।

मानवीय सहायतासम्बन्धी राष्ट्रसङ्घका प्रमुख मार्टिन ग्रिफिथले अहिले अफगानिस्तानले मानवीय, आर्थिक, जलवायु, भोकमरी र वित्तीय धेरै सङ्कटहरूको सामना गरिरहेको बताउँदै द्वन्द्व, गरिबी, खाद्य असुरक्षालागयत लामो समयदेखिको दुःखद वास्तविकताबाट कोही अनभिज्ञ नरहेको स्मरण गराएका थिए ।