नेपाली कथानक चलचित्र ‘महापुरुष’का नायक अरुण क्षेत्री भएको निर्माण पक्षले संकेत गरेको छ । महापुरुषको फर्ष्टलुक पोस्टर सार्वजनिक गर्दा निर्माण पक्षले हरिबंश आचार्यलाई केन्द्रमा राखेपछि उनी नै चलचित्रको हिरो हुन् अथवा अरु नै छन् भन्ने धेरैले प्रश्न गरेका थिए ।

निर्माण पक्षले सार्वजनिक गरेको यो नयाँ पोष्टरसँगै निर्देशक प्रदीप भट्टराईले ‘महापुरुषका हाम्रो नायक अरुण क्षेत्रीलाई चिनाउन ल्याएका छौँ’ भनेका छन् । यसले अरुण चलचित्रको केन्द्रीय चरित्र रहेको स्पष्ट पारेको छ ।

निर्देशक भट्टराईले आफूले अरूणप्रति विश्वास गरेको र चलचित्र रिलिज भएपछि समग्र चलचित्र उद्योग र दर्शकले पनि भरोसा गर्ने बताएका छन् । भट्टराई स्वंले लेखेको चलचित्रमा अरुणसँगै हरिवंश आचार्य, गौरी मल्ल, रविन्द्र सिंह बानियाँलगायत कलाकार मुख्य भूमिकामा छन् ।

‘महापुरुष’ले कात्तिक ११ गतेका लागि रिलिज डेक लक गरेको छ ।