फिल्म ‘प्रसाद २’ को निर्देशकमा सुदर्शन थापा अनुबन्धित भएका छन। प्रसाद २ लाई थापाले निर्देशन गर्ने पक्का भएको यस फिल्मका लेखक सुशील पौडेलले जानकारी दिए।

निर्देशक सुदर्शन थापाले पनि आफू काम गर्ने पक्का भइसकेको जानकारी दिए। आफू फिल्ममा काम गर्न निकै उत्साहित रहेको समेत उनको भनाइ छ।प्रसाद २ यसअघि बनेको फिल्म प्रसाद को सिक्वेल फिल्म हो। सिक्वेलमा पनि नम्रता श्रेष्ठ, विपिन कार्की र निश्चल बस्नेतको नै मुख्य भूमिका रहनेछ। अन्तरजातीय प्रेमसम्बन्ध र जातीय विभेदमा आधारित यस फिल्मको कथा पनि पहिलो श्रृखंला सकिएको ठाउँबाट नै सुरू हुने लेखक पौडेलले बताए।

यसअघि यस फिल्मलाई सौरभ चौधरीले निर्देशन गर्ने चर्चा चलेको थियो। तर सौरभले फिल्मको कार्यशालाको मात्रै निर्देशन गर्ने कुरा भएको पौडेलले सुनाए। सुभाष थापा निर्माता रहेको फिल्म आगामी असार १५ गतेबाट छायाँकन सुरू हुने बताइएको छ।