काठमाडौं। गएराति भएको इंग्लिस प्रिमियर लिग फुटबल अन्तर्गतको खेलमा आर्सनलले फराकिलो जीत हासिल गरेको छ । आर्सनलले वेस्ट ब्रोमलाई उसैको मैदानमा ४(० ले हराएको हो ।

आर्सनलको जीतमा एलेक्जेन्डर लाकाजेटले दुई तथा कायरन टियर्ने र बुकायो साकाले १-१ गोल गरे । पहिलो हाफमा दुई गोल गरेको आर्सनलले दोस्रो हाफमा पनि दुई गोल थपेको थियो ।खेलको २३औं मिनेटमा टियर्नेले गोल गर्दै पाहुना टोलीलाई अग्रता दिलाएका थिए ।
२८औं मिनेटमा साकाले गोल गर्दै आर्सनलको अग्रता दोब्बर पारे ।दोस्रो हाफको ६०औं मिनेटमा लाकाजेटले गोल गर्दै आर्सनललाई ३-० ले अगाडि बढाए । त्यसको चार मिनेटमै लाकाजेटले व्यक्तिगत दोस्रो गोल गरेपछि पाहुना टोलीको ४-० को जीत सुनिश्चित गरे ।

योसँगै लगातार तेस्रो जीत निकालेको आर्सनल १७ खेलबाट २३ अंक जोड्दै ११औं स्थानमा उक्लिएको छ । पराजित वेस्ट ब्रोम ८ अंकसहित पुछारबाट दोस्रोमा छ ।