बिहीवार काठमाडौंमा एउटा नयाँ फिल्मको घोषणा गरिएको छ । फिल्मको शीर्षक छ-‘रुमानी रङ ।’ फिल्मको मुख्य भूमिकामा प्रस्तुत हुँदैछन् अभिनेत्री साम्राज्ञी राज्यलक्ष्मी शाह तथा अभिनेता धिरज मगर । उनीहरुको मुख्य भूमिका रहने यो रोमान्टिक फिल्मको पत्रकार सम्मेलनमार्फत निर्माण घोषणा गरिएको हो ।

अनिल योञ्जनको निर्देशन रहने यो फिल्ममार्फत साम्राज्ञी र धिरजले दोस्रो पटक अनस्क्रिन रोमान्स गर्न लागेका हुन् । यसअघि उनीहरुको जोडीले ‘इन्टु मिन्टु लण्डनमा’ मार्फत दर्शकको मन जितिसकेको छ । उनीहरु करिव पाँच वर्षपछि एकसाथ पर्दामा आउन लागेका हुन् ।‘रुमानी’ को अर्थ एउटा सुन्दर र मनमोहक हो, यही शीर्षकमा ‘रंग’ थपेर निर्माण हुने यो फिल्मको कथा, पटकथा तथा संवाद निर्देशक योञ्जनले नै लेखेका छन् । रहनेछ। ग्लोबल मिडिया एण्ड रिसर्च सेन्टर प्रालिको व्यानरमा निर्माण हुने यो फिल्मको प्रस्तुतकर्ता जिएम ठकुरी हुन् भने निर्माता हरि मल्ल ठकुरी हुन् ।

यसअघि यो टिमले एक्सन थ्रिलर फिल्म ‘लाखे’ निर्माण गरेको थियो । यो फिल्ममा आविस्कार बहुसञ्चार प्रालिको सहकार्य रहने छ भने अष्ट्रेलियाको लाइन प्रोडियूसरमा डिव्वाईज इन्टरटेन्मेन्ट रहेको छ ।यो कम्पनीले डमरूको डण्डीवियो, नेप्टे, क्यापटेन तथा ए मेरो हजुर जस्ता फिल्म अष्ट्रेलियामा वितरण गरिसकेको छ ।

रुमानी रंगको ९० प्रतिशत छायांकन अष्ट्रेलियामा हुनेछ भने बाँकी १० प्रतिशत नेपालमा हुनेछ । यो फिल्मले वर्तमान समयको आधुनिक प्रेमकथा प्रस्तुत गर्ने जानकारी निर्माण पक्षले दिएको छ। निर्माण पक्षले यसलाई रंगिन प्रेम कथासमेत भनेको छ ।