‘प्रकाश’का निर्देशक दिनेश राउतले नयाँ फिल्म घोषणा गरेका छन्।उनले आफ्नो सातौं फिल्मको रुपमा ‘पुजार सार्की’ घोषणा गरेका हुन्। फिल्मलाई विकास सुवेदीले लेखेका छन्। फिल्मलाई सुभाष भुषालले निर्माण गर्नेछन्।

किङ्गडम नेटवर्कको प्रोडक्सनमा बन्ने फिल्मलाई आरआर फिल्म्सले वितरण गर्नेछ।फिल्म माघको पहिलो साताबाट छायाँकनमा जानेछ। फिल्ममा अहिलेसम्म पात्रहरू भने सार्वजनिक गरिएको छैन।

लेखक सुवेदीका अनुसार फिल्म एकजना क्रान्तिकारी दलित पात्रको जीवनमा आधारित हुनेछ।‘म पश्चिम नेपालमा एकजना दलित पात्रको जीवनबाट एकदमै प्रभावित थिएँ। उहाँ हाम्रो परिवारसँग जोडिएको व्यक्ति हुनुहुन्थ्यो। यस विषयमा कसैले फिल्म बनाइदिए हुन्थ्यो जस्तो लाग्थ्यो,’ उनले नेपाललाइभसँग भने, ‘ यो संवेदनशील मुद्दा भएका कारण यसमा अध्ययन पनि उतिकै चाहिन्छ। अब हामी तयार भइसकेका छौँ।’