प्रधानमन्त्री पुष्पकमल दाहाल ‘प्रचण्ड’ ले वर्तमान सरकारले सामाजिक न्याय, सुशासन र समृद्धिलाई प्रमुख प्राथमिकतामा राखेको बताएका छन् । सरकार चुनौतीपूर्ण परिस्थितिको सामना गर्ने सङ्कल्पसहित अर्थतन्त्रलाई लयमा फर्काउन तथा देशमा नयाँ रक्तसञ्चार गर्न प्रतिबद्ध रहेको उनको भनाइ छ ।

काठमाडौंमा आयोजित एक कार्यक्रममा प्रधानमन्त्री दाहालले भने, “सरकारको तर्फबाट मैले पटकपटक भन्दै आएको छु, खेलकुद, साहित्य र कलाको क्षेत्र सामाजिक क्षेत्र राष्ट्रिय एकताका सबैभन्दा महत्त्वपूर्ण आयाम हुन्, यिनीहरूका माध्यमबाट सिङ्गो देशलाई एकताबद्ध गर्न सकिन्छ ।”

प्रधानमन्त्री दाहालले आफू पहिलो पटक प्रधानमन्त्री हुँदा सामाजिक, सांस्कृतिक र खेलकुद क्षेत्रलाई राष्ट्रिय एकता प्रवर्द्धन गर्ने क्षेत्रका रूपमा विकास गरेको उल्लेख गर्दै अहिले पनि सो क्षेत्रको विकासका निम्ति महत्त्वपूर्ण भूमिका निर्वाह गर्दै आएको बताए ।