महेश त्रिपाठी र बिनिता थापामगरको मुख्य भूमिका रहेको फिल्म ‘हल्कारा’ को प्रदर्शन मिति तय भएको छ। बिक्रम सापकोटा निर्देशित यो फिल्म वैशाख २९ गतेबाट प्रदर्शन हुनेछ।फिल्मको कथा बिक्रमसँगै विप्लप प्रतीक र आकाश बरालले मिलेर लेखेका हुन्। फिल्मले वैदेशिक रोजगारीको कथा समेटेको निर्देशक सापकोटाले जानकारी दिए।

उनले भने, ‘फिल्मले गाउँमा चिठ्ठी पुर्‍याउने एक हल्काराको माध्यमबाट वैदेशिक रोजगारीले नेपाली समाजमा पारेको प्रभावलाई देखाउने कोसिस गरेको छ। फिल्म सत्यकथा प्रेरित हो। तर कथालाई सकेसम्म मनोरञ्जक हिसाबले प्रस्तुत गर्ने प्रयास गरिएको छ।’‘हल्कारा’ ले अन्तर्राष्ट्रिय स्तरमा विभिन्न अवार्ड जितिसकेको छ। अमेरिकाको ‘वर्ल्ड फेस्ट ह्युस्टन फिल्म फेस्टिभल’ मा ‘हल्कारा’ उत्कृष्ट फिल्म घोषित भएको थियो। साथै यसका मुख्य अभिनेता महेशले उत्कृष्ट अभिनेताको अवार्ड समेत जितेका थिए। त्यसैगरि नेपाल-अमेरिका फिल्म फेस्टिभलमा ‘लङ न्यारेटिभ’ विधामा यो फिल्म उत्कृष्ट भएको थियो।

फिल्म ‘नोभेम्बर रेन’बाट अभिनयमा डेब्यू गरेका महेशले ‘चपली हाइट ३’मा समेत काम गरिसकेका छन्। फिल्ममा महेश र बिनिताका साथै उमेश तामाङ, पशुपति राई, स्व. दीपक क्षेत्री, विद्या कार्की आदि कलाकारको अभिनय रहेको छ।