नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेका अध्यक्ष केपी शर्मा ओलीले माओवादी केन्द्रलाई सिध्याउने अभियान चलाइरहेको आरोप लगाएका छन्।

ललितपुरमा आयोजित चाडपर्वको अवसरमा शुभकामना आदान प्रदान कार्यक्रममा प्रचण्डले देशी विदेशी प्रतिक्रियावादीसँग मिलेर ओलीले माओवादी सिध्याउन खोजेको आरोप लगाएका हुन्।

प्रचण्डले आफूलाई टार्गेट गरेर ओलीले सिध्याउने रणनीति बनाएको बताउँदै भने,प्रतिक्रान्तिकारी जसलाई भनिएको छ उसको टार्गेट माओवादीमा पनि प्रचण्डलाई नसिध्याएसम्म माओवादी सिध्दिन्न भन्ने छ। त्यसैले उनीहरु प्रचण्ड सिध्याउने अभियानमा छन्।

प्रचण्डले आफूलाई व्यक्तिगत हारजितसँग कुनै मतलव नभएको भन्दै देशले जित्नुपर्ने बताए। माओवादी अन्तिम अवस्थासम्म लड्ने बताउँदै उनले त्यसका लागि तयारी गर्न कार्यकर्तालाई निर्देशन दिएका छन्।