नेपाल कम्युनिष्ट पार्टी (एकीकृत समाजवादी) की सचिव तथा सहरी विकासमन्त्री रामकुमारी झाँक्रीले नेकपा एमाले अध्यक्ष केपी ओलीले आफ्नो भक्तिगान गर्नेलाई चाकर बनाएको टिप्पणी गरेकी छन् ।

शनिबार नेकपा (एकीकृत समाजवादी) धुलिखेल नगर कमिटीले आयोजना गरेको विजया दशमी तथा शुभ दीपावली २०७८, नेपाल संवत् ११४२ र छठ पर्वको शुभकामना आदानप्रदान एवं चियापान कार्यक्रमलाई सम्बोधन गर्दै मन्त्री झाँक्री ओलीमाथि खनिइन् ।

उनले ओलीमा लोकतान्त्रिक चरित्र नभएकोसमेत जिकिर गरिन् । ओलीले आफ्नै बहुमतको सरकार हुँदासमेत असलशासन दिन नसकेको बताइन् । उनले ओलीको जीवनमा लोकतन्त्रको असल अभ्यास कहीँ कतै पनि नभेटिने टिप्पणी गरिन् ।

मन्त्री झाँक्रीले संविधानको रक्षा गर्दै जनताको भावना र चाहनाअनुसार जिम्मेवारीपूर्वक काम गरेर देखाउने बताइन्। ‘मैले पाएको जिम्मेवारीलाई जनभावनाअनुसार इमान्दारीका साथ निभाउन प्रयास गर्नेछु’, उनले भनिन्, ‘वर्तमान सरकारले देशमा भइरहेको भ्रष्टाचार र कुशासनविरुद्ध काम गर्नेछ।’