नेकपा(एमाले)का वरिष्ठ नेता माधवकुमार नेपालले पार्टी अध्यक्ष केपी शर्मा ओलीसमक्ष नझुक्ने बताएका छन् । मंगलबार उनी पक्षीय अनेरास्ववियु केन्द्रीय कमिटीले आयोजना गरेको सामुदायिक विद्यालयमा अध्ययन गरेर चिकित्सा शिक्षा आयोगको एमबीबीएस प्रवेश परिक्षामा सर्वोत्कृष्ट अंक ल्याएका आशिक झालाई सम्मान गर्ने कार्यक्रममा नेता नेपालले ओलीको नाम नलिई आफूहरू कसैको सामु नझुक्ने बताए ।

आफूहरू कसैको सामु शिर नझुकाउने र कसैको टाङमुनि नछिर्ने उनको भनाइ छ । बरु आफूहरू दृढताका साथ अघि बढ्ने उनले बताए ।

“हामी दृढताका साथ अगाडि बढ्छौँ । शिर निहुराउने छैनौँ । कसैको टाङमुनि छिर्ने छैनौँ । अँध्यारो सुरुङमा जानेवाला छैनौँ । दम्भी, अहंकारी र गलत ढंगले चल्नेहरूलाई चुनौती दिएर नै तिनलाई माथ गरेर नै अगाडि बढ्नेछौँ,” उनले भने ।