इराकको राजधानी बगदादमा बम विस्फोट हुँदा ३५ जनाको मृत्यु भएको छ। इदको लागि सामान खरिद गर्न मानिसको भिड रहेको बजारलाई लक्षित गर्दै बम आक्रमण गरिएको अलजजिराले उल्लेख गरेको छ। सदर शहरको वाहालिट बजारमा गराइएको विस्फोटमा महिला र बालबालिका समेत मारिएका छन्।

इस्लामिक स्टेटले आफ्नो लडाकूहरुले आत्मघाती बम विस्फोट गरेको स्वीकारेको छ।प्रहरीले बम आक्रमणमा ६० जनाभन्दा बढी घाइते भएको जनाएको छ। केही घाइतेहरुको अवस्था गम्भीर रहेकोले मृतकको संख्या वृद्धि हुन सक्ने बताइएको छ।

इराकी राष्ट्रपति बराहम सलिहले घटनाको निन्‍दा गर्दै इस्लामिक अतिवादीहरुले मानिसलाई एकछिन पनि खुशी देख्न नचाहेको टिप्पणी गरेका छन्।