पोर्चुगिच फुटबल स्टार क्रिस्टियानो रोनाल्डोले युभेन्टस छाड्ने संकेत गरेका छन्। सिरि ए लिगुको चौथो स्थानमा युभेन्टस समेटिएसँगै इन्स्टाग्राममा उनले युभेन्टस छाड्ने संकेत दिएका हुन्। उनले उक्त पोस्टमा आफूले इटालीमा तय गरेको लक्ष्य पूरा गरेको जनाएका छन्।

रोनाल्डोको युभेन्टससँग २०२२ सम्मको करार छ। यो सिजन सकिएसँगै पेरिस सेन्ट जर्मेन (पीएसजी), म्यानचेस्टर युनाइटेड र रियल मड्रिडमा उनी आबद्ध हुन सक्ने चर्चा चलिरहेको बताइएको छ। इटलियन सञ्चारमाध्यमहरुले पनि रोनाल्डो टुरिन शहरबाट बाहिरिन खोजिरहेको बताएका छन्।

‘कुनै पनि उत्कृष्ट खेलाडीको जीवन र करियरमा तलमाथि भइरहन्छन,’ रोनाल्डोले इन्स्टाग्राममा लेखेका छन्, ‘वर्षेनी हामीले उत्कृष्ट टिमहरुमा असामान्य खेलाडीहरुको महत्वकांक्षी गोलहरुसँग सामना गरिरहेका हुन्छौं। त्यसैले हामी उत्कृष्ट रहन सँधै आफ्नो ‘बेस्ट’ दिइरहेका हुन्छौं।’