पाँचौँ आरबीबी एनभीए राष्ट्रिय पुरुष तथा महिला भलिबल लिगको लागि मिडिया हबले साझेदारी गरेको छ । सोमबार मिडिया हब र नेपाल भलिबल संघले ‘ब्रोडकास्टिङ-राइट’का लागि सम्झौतापत्रमा हस्ताक्षर गरेका हुन् ।

उक्त लिग यही चैत १९ देखि २६ गतेसम्म त्रिपुरेश्वरस्थित दशरथ रंगशालाको कभर्डहलमा आयोजना हुँदै छ । मिडिया हबले नेपाल भलिबल संघसँग प्रत्यक्ष प्रसारणका लागि सम्झौता गरेको हो ।

प्रतियोगिताको प्रत्यक्ष प्रसारण गरेबापत मिडिया हबले कुल चार लाख १० हजार रुपैयाँ नेपाल भलिबल संघलाई प्रदान गर्नेछ । मिडिया हबले प्रतियोगिताको प्रत्यक्ष प्रसारण आफ्नो युट्युब च्यानल र अन्य चर्चित सामाजिक सञ्जालका विभिन्न प्लेटफर्ममा गर्नेछ ।