इंग्लिस प्रिमियर लिग फुटबलमा आर्सनलले सहज जित निकालेको छ ।

मंगलबार राति भएको खेलमा आर्सनलले साउथह्याम्पटनलाई ३-१ गोलले पराजित गरेको हो ।साउथह्याम्पटनको मैदानमा एक गोलले पछि परेको अवस्था उल्ट्याउँदै आर्सनलले पुनरागमन जित निकालेको हो ।

खेलको तेस्रो मिनेटमा स्टुवार्ट आर्म्सट्रोङले गोल गर्दै घरेलु टोलीलाई अग्रता दिलाएका थिए । तर, खेलको आठौं मिनेटमा निकोलस पेपेले गोल गर्दै आर्सनललाई १-१ गोलको बराबरीमा ल्याए ।खेलको ३९औँ मिनेटमा बुकायो साकाले गोल गर्दा आर्सनल २-१ ले अघि रह्यो । त्यसपछि खेलको ७२औँ मिनेटमा एलेक्सजेन्डर लाकाजेटले गोल गर्दै आर्सनललाई ३-१ को जित दिलाए ।