अर्जेन्टिनासँगको विश्वकप छनोट फुटबलमा ४–१ को पराजयपछि ब्राजिलले प्रशिक्षक डोरिभल जुनियरलाई बर्खास्त गरेको छ।

सन् २०२४ को जनवरीदेखि उनले राष्ट्रिय टोलीको जिम्मेवारी सम्हालेका थिए। इङ्गल्यान्डसँगको पहिलो मैत्रीपूर्ण खेलमा १-० को सफलता दिलाएका उनको कार्यकालमा ब्राजिलले ७ खेलमा जित हात पारेको थियो भने ६ बराबरी गर्नुका ३ खेलमा पराजयको सामना गरेको थियो।

विश्वकपमा छनोट भइरहेको अर्जेन्टिनासँग भएको फराकिलो हारपछि उनलाई बर्खास्त गर्दै नयाँ प्रशिक्षकको खोजी सुरु गरिएको हो।

खेलाडीको रूपमा राष्ट्रिय टोलीबाट कहिले पनि नखेलेका डोरिभलले प्रशिक्षकको रूपमा सन् २०२२ मा फ्लेमिङ्गोलाई कोपा लिबरटाडारेस कपको उपाधि दिलाएका थिए।

ब्राजिलियन सञ्चार माध्यमका अनुसार अल हिलालका प्रशिक्षक जर्ग जेससको सम्भावना बढी छ।

ब्राजिलियन फुटबल महासङ्घले डोरिभललाई टोलीको जिम्मेवारी दिनु अघि रियल म्याड्रिडका प्रशिक्षक कार्लोस एन्सेलोटी ल्याउने असफल प्रयास गरेको थियो।