घरेलु टोली नेपाल साफ यू-२० च्याम्पियनसिपको फाइनलमा पुगेको छ। आइतबार भएको सेमिफाइनलमा नेपालले भुटानलाई टाइब्रेकरमा हराउँदै फाइनलमा पुगेको छ। नेपालको जितका लागि गोलकिपर जियारेथ शेखले शानदार प्रदर्शन गरे। उनले दोस्रो र तेस्रो प्रहार लगातार रोकेका थिए भने नेपालको चौथो प्रहार आफैंले गर्दै गोल गरे। जियारेथअघि नेपालले सुरुका तीनवटै प्रहारमा गोल गरेको थियो।

दोस्रो हाफमा कुशल देउवालाई सब्स्टिच्युट गरिएपछि कप्तानीको जिम्मा गोलकिपर शेखले पाएका थिए। निर्धारित समयको खेल १-१ गोलको बरारबीमा सकिएपछि खेल पेनाल्टी सुटआउटमा पुगेको थियो। एन्फा कम्प्लेक्समा भएको खेलमा सुरुवाती अग्रता भुटानले लिएको थियो।भुटानका जेत्सुएन दोर्जेले ५५ औँ मिनेटमा गोल गरेका थिए। उनले डी बक्सबाहिरबाट फस्ट बार च्यापेर गरेको प्रहार गोल भएको थियो। ७८ औँ मिनेटमा नेपालका निराजन धामीले गोल गरे। उनले एयर बलमा डीबक्सभित्रबाट हेडमार्फत गोल गरेका थिए। अब भोलि हुने भारत र बंगलादेशबीचको खेलको विजेतासँग नेपालले उपाधि भिडन्त गर्नेछ।