सरकार र विपक्षी दुबैले संसद बैठक नियमित चल्नुपर्ने बताइरहेका बेला सभामुख देवराज घिमिरे १० दिनसम्म बैठक रोकेर स्वीट्जरल्याण्ड उडेका छन् । सभामुखको अनुपस्थितिमा उपसभामुखले बैठक चलाउन सक्ने भए पनि सभामुखको विदेश भ्रमणबारे उपसभामुख बेखबर छिन् ।

सभामुख घिमिरे १० दिनसम्म प्रतिनिधिसभा बैठक नै स्थगित गरेर विहीबार स्वीट्जरल्याण्ड उडेका हुन् । प्रायः सबै दलका दलका सचेतकसमेत लिएर सभामुख अन्तरव्यवस्थापिका संघ आईपीयू को १४८ औँ महासभामा भाग लिन बिहीबार स्वीट्जरल्याण्ड प्रस्थान गरेका हुन् । भ्रमण टोलीमा राष्ट्रियसभाका सांसद समेत छन् । उनी चैत १० देखि १४ सम्म जेनेभामा हुने कार्यक्रमका लागि गएको सभामुखको सचिवालयको भनाइ छ ।

लामो समयसम्म प्रतिनिधिसभाको बैठक नै रोकेर सभामुख विदेश जाँदा संसदका काम कारवाही प्रभावित बनेका छन् । आफ्नो अनुपस्थितिमा संसद चलाउन उनले उपसभामुखलाई अधिकारसमेत प्रत्यायोजन गरेका छैनन् ।

प्रतिनिधिसभा नियमावली, २०७९ को नियम ६ अनुसार सभामुखले लिखित अनुमति दिएको खण्डमा उपसभामुखले बैठक तथा अन्य निर्णयहरू गर्न पाउने व्यवस्था छ । तर, सभामुख घिमिरे आफूलाई कुनै जानकारी र निर्देशन नदिई स्वीट्जरल्याण्ड उडेको उपसभामुख रानाको गुनासो छ ।