बेरोजगार युवालाई सरकारले नै गोली हानेर हत्या गर्यो
न्यूजडेली नेपाल
राष्ट्रिय प्रजातन्त्र पार्टी (राप्रपा)ले बालकुमारीमा आज प्रहरीको गोली लागेर दुई युवाको ज्यान गएको घटनालाई दुर्भाग्यपूर्ण भनेको छ ।
“कोरियाली भाषा सम्बन्धी ईपीएस परीक्षामा सहभागिताको विषयलाई लिएर ललितपुरको बालकुमारी क्षेत्रमा आन्दोलनमा उत्रिएका युवाहरू लक्षित सरकारको दमन र गोली प्रहारको घटना दुःखद, आपत्तिजनक र दुर्भाग्यपूर्ण छ,” राप्रपाले भनेको छ ।
राप्रपाका अध्यक्ष राजेन्द्र लिङ्देनले जारी गरेको विज्ञप्तिमा स्वदेशमा गरी खान पाउने वातावरण नपाएका बेरोजगार युवालाई सरकारले संयमता गुमाएर गोली प्रहार गरेर हत्या गर्नु गम्भीर चिन्ताको विषय बताइएको छ ।
“ईपीएस कार्यालय अगाडि भएको प्रदर्शनका क्रममा दुई युवाको हत्या गरेर सरकार स्वयंले परिस्थितिलाई उत्तेजित तुल्याएको छ । घटनाको सत्यतथ्य छानबिन गर्न, घाइतेको उपचार गर्न राप्रपा सरकारसँग माग गर्दछ,” विज्ञप्तिमा भनिएको छ ।
