नेपाली नागरिकहरु युक्रेन विरुद्ध लडिरहेको रुसको सेनामा भर्ती भएको र छ जना नेपालीहरु मारिएको खबर आएपछि नेपाल सरकारले दुबै देशलाई पत्राचार गर्ने निर्णय गरेको छ ।

नेपाल सरकारले रुस र युक्रेन दुबै देशलाई पत्र पठाएर नेपाली नागरिकलाई सेनामा भर्ती नलिन औपचारिक आग्रह गर्ने भएको छ ।

प्रधानमन्त्री पुष्पकमल दाहाल यसै साता कोप सम्लेलनमा भाग लिन युएई हिँड्ने बेलामा रुसस्थित नेपाली दूताबासले ६ जना नेपालीको मृत्यस भएको सूचना परराष्ट्र मन्त्रालयमार्फत सरकारलाई दिएको थियो ।

लगत्तै प्रधानमन्त्री पुष्पकमल दाहालले प्रधानसेनापति, प्रहरीका प्रमुख, मन्त्रालयका सचिवसमेतको बैठक बोलाएर छलफल गरेका थिए ।

सो छलफलमा रुसी सेनामा कति नेपाली गएका छन्, पढ्न जाने अनुमति लिनेहरु त्यसरी सेनामा भर्ना भएका हुन् कि वा कुन स्रोतबाट गएका हुन् भन्नेबारे रुसी राजदूतसँग छलफल गर्ने निर्णय गरेको थियो ।

यसैवीच सोमबार सिंहदरबारमा परराष्ट्र मन्त्रालयका अधिकारीसँगको छलफलपछि सरकारले रुस र युक्रेन दुबै देशलाई सैन्य भर्ना नगर्न पत्राचार गर्ने निर्णय गरेको प्रधानमन्त्रीको कार्यालयले जानकारी दियो ।

स्रोतले भन्यो,‘रुसी सेनामा मात्र होइन, युक्रेनको सेनामा पनि नेपालीहरु भर्ती भएको सूचना आएको छ । नेपालले सम्झौता नगरेको देशमा यसरी नेपालीलाई सैन्य कार्यमा लगाउन पाइँदैन ।’

त्यसो त सिंहदरबारमा सरकारी अधिकारीबीच भएको छलफलमा एनओसी लिएर रुसमा पढ्न जाने विद्यार्थी र टुरिष्ट भिसामा जानेहरुमाथि पनि रोक लगाउनेबारे छलफल भएको थियो ।

तर, उनीहरुलाई रोक नलगाइने भएको छ । यसबारे जानकारी दिँदै प्रधानमन्त्री दाहालले भने,‘रुसमा पढ्न जाने विद्यार्थीमाथि रोक लगाइने छैन, तर सैन्य भर्तीमा नजान र नलगाउन सचेत गराउने सरकारले नीति लिएको छ ।