राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रले संसद् भवनअगाडि प्रेमप्रसाद आचार्यले गरेको आत्मदाहको प्रयासले आफूसहित परिवर्तनका पक्षधरहरू असफल भएको स्वीकार गरेका छन् ।

बिहीबार उनले सामाजिक सञ्जाल फेसबुकमार्फत धारणा सार्वजनिक गर्दै उक्त घटनालाई ‘परिवर्तनका लागि प्रयास गरिरहेकादेखि दशकौँदेखि नेतृत्वमा बसेकाहरूको परिणाम’ भनेका छन् ।

“‘म आमरण अनशन बस्ने योजनामा छु !’ प्रेमजी, तपाईंले अस्ति बिहान मलाई पठाएको सन्देश हो यो । तर, त्यसको केही घण्टाभित्रै दिउँससम्ममा तपाईंले आत्मदाह रोज्नुभएछ,” मिश्रले लेखेका छन्, “तपाईंले आत्मदाहपूर्वको पत्रमा उल्लेख गर्नुभएझैँ तपाईंको आत्मदाह देशको परिवर्तनका लागि प्रयास गरिरहेका हामी कैयौँ र दशकौँदेखि देशको नेतृत्वमा बसेकाहरूको विफलताको परिणाम हो ।”

उनले आचार्यको मृत्युले आफूलाई अत्यन्तै पीडा दिएको भन्दै समाज नै पतनमा गएको टिप्पणी गरेका छन् । “अत्यन्तै पीडा भएको छ, प्रेमजी ! इमानदारीपूर्वक भन्दा, नेपाली समाज इतिहासमै यति ‘पतित’ कहिल्यै भएको थिएन,” उनले लेखेका छन्, “विगतमा हाम्रो समाज अशिक्षा, रूढिवाद र गरिबीबाट ग्रस्त थियो । तर, यो तहको ‘पतित–ता’ बाट ग्रस्त थिएन । त्यस्तो ‘पतित–ता’ जहाँ समाज र देश परिवर्तन गर्न सक्ने शिक्षा, आधुनिकता र सम्पन्नता भएकाहरूमा, अपवादलाई छोडेर, नैतिकता र मानवता शून्य भएको छ ।”मिश्रले आचार्यको आग्रहअनुसार उनकी श्रीमतीलाई सहयोग गर्न लागेको भन्दै देश–विदेशमा रहेका सहयोगीहरूलाई अपिल पनि गरेका छन् ।