केही दिनयता तापक्रम घट्न थालेको छ । तापक्रम घट्दा चिसो भने बढ्दै गएको छ । हिमाली भू–भागमा हिमपात सुरु भइसकेको छ । जसका कारण चिसो बढ्न थालेको हो ।

चिसो बढेकाले यसबाट बच्न आवश्यक सावधानी अपनाउनु पर्ने जल तथा मौसम विज्ञान विभागले जनाएको छ । “तापक्रम क्रमिक रूपमा घट्दै जाने सम्भावना रहेकाले चिसोबाट बच्न आवश्यक सावधानी अपनाउनुहुन अनुरोध छ,” विभागले भनेको छ ।

हिमपातका कारण पर्वतारोहणमा पनि अवरोध आउन सक्ने विभागको भनाइ छ । पर्वतारोहण र पद यात्रा गर्दा सतर्कता अपनाउन विभागको आग्रह छ ।

यसैबीच, आज दिउँसो सुदूरपश्चिम र कर्णाली प्रदेशका हिमाली भू–भागका थोरै स्थानमा तथा बाँकी प्रदेशका हिमाली भू–भागका एकदुई स्थानमा हल्का हिमपातको सम्भावना रहेको छ ।