साउदी अरबको योग समितिले मुलुकका विश्वविद्यालयहरुमा योगलाई प्रोत्साहन गर्ने भएको छ ।

हालै साउदी योग समितिले एक भर्चुअल कार्यक्रमको आयोजना गर्दै साउदी अधिराज्यका विश्वविद्यालयहरुमा योगलाई प्रोत्साहन गर्ने विषयमा छलफल गरेको साउदी गजेट अखबारले जनाएको छ । ‘दुबै लिङ्गका विश्वविद्यालय विद्यार्थीका लागि योग’ शीर्षकमा उक्त भर्चुअल कार्यक्रमको आयोजना गरिएको हो ।

साउदी विश्विद्यालय खेलकुद महासंघको सहकार्यमा विश्वविद्यालयमा योगको प्रवर्द्धन एवम् प्रोत्साहन गरिने जनाइएको छ ।यससँगै आगामी दिनहरुमा साउदी विश्वविद्यालयमा योगसँग सम्बन्धित अभ्यास एवम् अन्य कार्यक्रमहरुको आयोजना गरिने जनाइएको छ । यसका लागि योग रेफ्रीहरुलाई तालिमको पनि व्यवस्था गरिने साउदी गजेटले उल्लेख गरेको छ ।

साउदी अरबको खेलकुद मन्त्रालय र साउदी योग समितिको सहकार्यमा रेफ्रीहरुका लागि तालिमको आयोजना गरिनेछ ।युवाहरुको शारीरिक एवम् मानसिक स्वास्थ्यलाई मजबुत बनाउनका लागि साउदी अरबमा ठूलो स्तरमा योगको प्रवद्र्धन गर्ने उद्देश्य राखिएको साउदी योग समितिकी अध्यक्ष नउफ अलमर्वाईले बताइन् ।