नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीले आफ्नो पक्षमा निर्णय गराउनका लागि अदालतलाई धम्की दिइरहेको दाबी गरेका छन् । विपक्षी गठबन्धनले बुधबार गरेको अन्तरक्रियामा बोल्दै देउवाले संसद् विघटनलाई सदर गराउन ओली सक्रिय बनेको भएपनि अदालतले स्वतन्त्र रूपमा निर्णय गर्नेमा आफू विश्वस्त रहेको बताए ।

उनले कार्यकारी जहिलेपनि तानशाही प्रवृत्तिको हुने पनि बताए । तर, कार्यकारीको तानशाही प्रवृत्तिलाई न्यायालयले मात्र रोक्नसक्ने देउवाको भनाइ छ ।

“उहाँ (प्रधानमन्त्री)ले अदालतमा धम्की दिइरहनुभएको छ । न्यायाधीशहरूले प्रधानमन्त्रीको धम्कीमा जाने हो भने के होला देश ? कहाँबाट न्यायालय टिक्ला त ? कार्यकारीले सत्ताको दुरुपयोग गर्न सक्दछ । कार्यकारी पावर भनेको जहिलेपनि तानाशाही प्रवृत्तिको हुन्छ । संसद् पनि कहिलेकाहीँ ठप्प गरिदिनसक्छ बहुमतको आधारमा । तर एउटा मात्रै संस्था छ जो न्याय गर्छ । त्यो हो न्यायालय ।
त्यसकारण स्वतन्त्र न्यायालय भनेको त्यो हो । त्यो मात्रै स्वतन्त्र न्यायालय हो । प्रधानमन्त्रीको केही लाग्दैन यहाँ । कतिवटा प्रधानमन्त्रीको केही लागेन नि यहाँ । हामीलाई विश्वास छ ओलीको धम्कीबाट कुनैपनि न्यायाधिशहरू डराउनुहुने छैन,” देउवाले भने ।