सुनकाण्डमा मुछिएका व्यवसायी विमल पोद्दारसहित १७ विरुद्ध मुद्दा
न्यूजडेली नेपाल
जिल्ला सरकारी वकिल कार्यालय काठमाडौंले विभिन्न आर्थिक अपराधमा मुछिएका व्यवसायी विमल पोद्दारसहित १७ जनाविरुद्ध हालसम्मकै ठूलो बिगो मागदाबी गर्दै मुद्दा दायर गरेको छ ।
मुद्दा चलाइएकामध्ये व्यवसायी रूपेश श्रेष्ठ हुण्डी र अनलाइन जुवा सञ्चालन गरेको आरोपमा मसिर ६ गते पक्राउ परेका थिए । उनीमाथि अनुसन्धान गर्दै जाँदा सीआइबीले पोद्दारसहितको संलग्नतामा हालसम्मकै ठूलो हुण्डी र क्रिप्टो कारोबार भएको तथ्य पत्ता लगाएको थियो ।
यो प्रकरणमा रूपेशका भाई दीपेश श्रेष्ठ, आशिष अग्रवाल, मीनबहादुर जिसी, कुमार परियार, झनिन्द्रप्रसाद खतिवडा पक्राउ परिसकेका छन् । रचना शर्मा, विमल पोद्दार, ओमकुमार श्रेष्ठ, बिगल सिंह शर्मा, शरद भट्टराई, वीरेन्द्र मगर, दीपक शर्मा, वाङ्देन फुन्सोक लामा, गोविन्दप्रसाद श्रेष्ठ, रुदे तामाङ र अंशुल श्रेष्ठ फरार छन् । उनीहरू सबैलाई प्रतिवादी बनाइएको छ ।
जिल्ला सरकारी वकिल कार्यालयले प्रतिवादीहरूबाट २ खर्ब ८६ अर्ब ४ करोड २५ लाख ८ हजार ७५४ रुपैयाँ बिगो माग गरेको जानकारी दिएको छ ।
