काठमाडौंमा सम्पन्न पहिलो हिमालयन फुटसल प्रतियोगिताको उपाधि क्रिजल फुटबल क्लबले जितेको छ । फाइनलमा टीकापुर ग्रिनसिटी फुटबल क्लबलाई ४–१ ले पराजित गर्दै क्रिजलले प्रतियोगिताको उपाधि जितेको हो ।

विजेता टोली क्रिजल एफसीले नगद एक लाख ११ हजार १११ रुपैयाँसँगै ट्रफी र मेडल हात पारेको छ । उपविजेतामा चित्त बुझाएको टीकापुर ग्रिनसिटीले ५५ हजार ५५५ रुपैयाँसँगै पुरस्कार प्राप्त गर्यो ।

प्रतियोगिताको उत्कृष्ट खेलाडी क्रिजल एफसीका विवश पण्डित घोषित भए । विवश एक्लैले फाइनलमा चार गोल गरेका थिए । उत्कृष्ट गोलकिपरको पुरस्कार टीकापुरका सविन जोशीले प्राप्त गरे । दुवैले समान पाँच हजार ५५५ रुपैयाँ हात पारे ।

प्रतियोगितामा ११ हजार १११ रुपैयाँको ‘फेयर प्ले अवार्ड’ भाटभटेनी हेल्थ क्लबले प्राप्त गर्यो ।

प्रतियोगिताको समापन समारोहमा नेपाली फुटबल टिमका पूर्वकप्तान तथा राष्ट्रिय फुटसल टिमका पूर्वप्रशिक्षक राकेश श्रेष्ठले विजेतालाई ट्रफी प्रदान गरेका थिए ।

हिमालयन फुटबल क्लबको आयोजनामा पहिलोपटक भएको प्रतियोगिता दुई दिनसम्म चलेको थियो । प्रतियोगितामा देशभरबाट ३८ फुटसल टिमले सहभागिता जनाएका थिए ।