नेकपा (एमाले) प्रतिनिधिसभाको संसदीय दलको उपनेतामा सुवास नेम्वाङ नियुक्त भएका छन् । एमाले अध्यक्ष समेत रहेका संसदीय दलका नेता केपी शर्मा ओलीले सोमबार नेम्वाङलाई संसदीय दलको उपनेतामा नियुक्त गरेका हुन् ।यही फागुन २५ गते भएको राष्ट्रपति पदको निर्वाचनमा एमालेले उपाध्यक्ष नेम्वाङलाई उमेदवार बनाएको थियो । राष्ट्रपतिमा पराजित भएसँगै नेम्वाङलाई संसदीय दलको उपनेता बनाइएको हो ।

“उक्त सम्बन्धमा, तपाईंलाई नेकपा (एमाले) संघीय संसदीय दलको उपनेतामा मनोनयन गरेको छु,” ओलीले नेम्वाङलाई गरेको नियुक्तिपत्रमा उल्लेख छ, “तदनुरूप यस पदको जिम्मेवारी सफलतापूर्वक सम्पन्न गर्नुहुनेछ भन्ने विश्वास लिएको छु । सफल कार्यकालको लागि हार्दिक शुभकामना ।”

यसअघिको संसद्मा पनि नेम्वाङ संसदीय दलको उपनेताकै जिम्मेवारीमा थिए ।