अमेरिकाको मिसिगन विश्वविद्यालयमा गोली चलेको छ। युनिभर्सिटी क्याम्पसमा मंगलवार बिहान भएको गोलीकाण्डमा ३ जनाको मृत्यु भएको छ।

सो घटनामा धेरैजना घाइते भएको स्थानीय संचारमाध्यमले उल्लेख गरेका छन्। प्रहरीका अनुसार केही घाइते व्यक्तिको अवस्था गम्भीर रहेको छ। ५ जनाको अवस्था गम्भीर रहेको बताइएको छ।प्रहरीका अनुसार गोली चलाउने व्यक्तिले आफैलाई गोली हानी मारेका छन्। उनको शव क्याम्पस क्षेत्रमा नै फेला परेको छ। त्यसपछि प्रहरीले एक अश्वेत व्यक्तिले गोली चलाएको भन्दै तस्विर सार्वजनिक गरेको थियो।

हाल विश्वविद्यालय क्षेत्रमा दुई दिनसम्म कुनै पनि गतिविधि आयोजना नगर्न आदेश दिइएको छ। घटनाबारे प्रहरीले अनुसन्धान गरिरहेको छ।पछिल्लो समय अमेरिकामा गोलीकाण्ड बढ्दै गइरहेको छ। विशेषगरि विश्वविद्यालय र विद्यालयमा गोली चल्ने घटना बढिरहेका छन्। जसकारण जो बाइडेन प्रशासनले यस्ता घटना रोक्न कानुन ल्याउने बारे छलफल गरिरहेको छ।