सशस्त्र प्रहरी बल (एपीएफ) क्लबका सलिम देवानले मंगलबार नवौँ राष्ट्रिय खेलकुदमा एथ्लेटिक्सको पुरुष लङजम्पमा राष्ट्रिय कीर्तिमानसहित स्वर्ण पदक जितेका छन् ।

पोखरा रंगशालामा आज बिहान सम्पन्न खेलमा सलिमले ७.०६ मिटर दूरी जम्प गर्दै कीर्तिमान बनाएका हुन् । यस स्पर्धामा त्रिभुवन आर्मीका डिल्ली खत्रीले रजत पदक जिते । डिल्लीले ६.९८ मिटर दूरी जम्प गरेका थिए । गण्डकी प्रदेशका नारायण चौधरीले ६.८२ मिटर जम्प गर्दै काश्य पदक जिते ।

आजै सम्पन्न महिला लङलम्पमा त्रिभुवन आर्मी क्लबकी जयरानी थारूले पनि राष्ट्रिय कीर्तिमानसहित स्वर्ण पदक जितेकी थिइन् । जयरानीले ५.५८ मिटर जम्प गर्दै राष्ट्रिय कीर्तिमानसहित स्वर्ण पदक जितेकी हुन् । यस स्पर्धामा यसअघि निशा चौधरीको नाममा ५.४७ मिटरको कीर्तिमान थियो । जयरानीको पोखरामा जारी नवौँ राष्ट्रिय खेलकुदमा यो तेस्रो स्वर्ण पदक हो ।

लुम्बिनी प्रदेशकी निशा चौधरीले ५.४९ मिटर जम्प गर्दै रजत पदक जित्दा एपीएफकी शिला चौधरीले ५.३१ मिटर जम्प गर्दै काश्य जितिन् ।

जयरानीले सोमबार महिला १०० मिटर हडल्समा कीर्तिमान बनाउँदै स्वर्ण पदक जितेकी थिइन् । जयरानीले आइतबार सम्पन्न महिला ४०० मिटर हडल्समा पनि कीर्तिमानसहित स्वर्ण पदक जितेकी थिइन् ।