संयुक्त राष्ट्रसंघ विश्व खाद्य कार्यक्रमका प्रमुख डेभिड बिस्लीले आउँदा महिनाहरु निकै सकसपूर्ण र विकराल हुने प्रक्षेपण गरेका छन् । उनले संयुक्त राष्ट्रसंघ स्थापनाको ७५ वर्षयता २०२१ मा सबैभन्दा ठूलो ‘विध्वंशकारी मानविय संकट देखिनसक्ने’ चेतावनी दिए । २७ करोड जनसंख्या भोकमरीतर्फ अघि बढिरहेको र केही देशमा खाद्यान्न संकटले ढोका ढक्ढक्याइरहेको पनि उनले बताए । बिस्लीले कोरोना भाइस महामारी र यसको विश्वव्यापी असरबारे छलफल गर्नका लागि सबै राष्ट्र एक ठाउँमा हुनुपर्ने बताए ।
सिरिया, यमन र दक्षिण सुुडानको उदाहरण दिदैं मानव सिर्जित द्वन्द्वले पनि भोकमरी बढाउन ठूलो भूमिका खेलेको उनले बताए । यसअघि राष्ट्रसंघका महासचिव एन्टोनियो गुट्रेस र उनका शीर्ष अधिकारीहरुले कोभिड १९ भ्याक्सिन सबैका लागि उपलब्ध हुनुुपर्ने र धनी राष्ट्रहरुले महामारी नियन्त्रणका लागि विकासिल राष्ट्रहरुलाई सहयोग गर्नुपर्ने बताएका थिए ।
विश्वमा कोरोना संक्रमितहरुको संख्या ६ करोड ५० लाख नाघिसकेको छ ।
कोरोनाभाइरसविरुद्धको भ्याक्सिन निर्माण दौड र आफ्नो आर्थिक संकट टार्ने विषयमा मात्रै ध्यान केन्द्रीत गरिरहेका धनी राष्ट्रहरुले विश्वव्यापी भोकमरीबारे पनि सोच्नुुपर्ने उनले बताए । महामारी र विभिन्न देशका सरकारले लिएको लकडाउन नीतिले थप चिन्ता बढाएको उनले बताए । ‘आर्थिक पाटोबाट हेर्दा रोगभन्दा यसको उपचार भयावह हुनसक्ने’ उनले बताए ।